بيقولوا شفروا مباريات كأس العالم
طب وايه يعنى هى جت على دى ما كل حاجة فى بلدنا مشفرة...
الوظائف فى مصر مشفرة يعنى مش لاى حد ليك واسطة تشتغل مالكش واسطة روح شوفلك موته...
ولا اقولك بلاش تشوفلك موته روح ادم فى الحزب الوطنى حايرحبوا بيك ويمكن يشغلوك ماهى البلد اصبحت بلد الحزب الوطنى واللى خارج الحزب يروحوا يشوفلهم قبر يلمهم....
العلاج فى مصر ايضا مشفر
معاك فلوس تتعالج ماعكشى فلوس روح شوفلك موته تريح بيها نفسك من المرض وتريح فيها الناس...
العمل فى السلك القضائى والسلك السياسى
دة بقى محدش يفتح بقه فيه لانه دة مشفر منذ قيام ثورتنا المجيدة يعنى ابن الغلابة مش ممكن يتنيل فى وظيفة من دة ..دى وظائف ربنا خلقها لناس معينة صفوة القوم الاكسلنسات فقط(يارب انت مخلقتنيشى ليه من الناس دول اقصد الاكسلنسات)
برضه التعليم مشفر يعنى واحد مابيفهمشى الالف من كوز الدرة وبعدين ابوة علشان معاه فلوس يروح يفتحله كلية طب خاصة بابنه وبعدين فى النص يعمل بيزنس ويدخل كام طالب واهو كله بتمنه....
الاكل كمان مشفر فى مصر
مين يقدر من الناس الغلابة يروح يشترى لحمة دول يمكن نسوا شكلها ايه وبتتاكل ازاى حتى السمك اللى ربنا خلق لينا بحرين ونهر طويل عريض وبحيرات مش قادرين تاكله العالم الغلابة
الله يبارك فيك ياسيادة الرئيس شوفنا كل العز فى عهدك ربنا يبارك فيك وفى اولادك من بعدك علاء وجمال وباين عليهم دول اللى حايورونا عز مابعده عز
ليست هناك تعليقات :
إرسال تعليق
شكرا للزيارة والتعليق