دا شعب فقرى
نظرا لأن النعمة فاقت حدها
ولأننا مش قدها
ولأن فعلا انجازاتك
فوق طاقتنا نعدها
ولأننا غرقنا في جمايل
مستحيل حنردها
°°°°°°°°°°°°°°°°°°°°°°°
نستحلفك ....... نسترحمك
نستعطفك .......نستكرمك
ترحمنا من طلعة جنابك
حبتين
عايزين نجرب خلقة تانية
ولو يومين
اسمع بقى
إحنا زهقنا من النعيم
ونفسنا في يومين شقا
ونعوم ونغرق في الفساد
بيني وبينك حضرتك
دا شعب فقرى مايستحقش جنتك
أنا عارفه شعب ماينفعوش
إلا شارون وبلير وبوش
عايز يجرب الامتهان
ويعيش عميل للأمريكان
بيمد "غازه" لإسرائيل
ويومين كمان ويمد نيل
أهو يعنى نشرب ميه واحدة
ندوب في بعض
ماء وماء وماء
ونفض سيرة الانتماء
وبلاها نعرة وطنطنة
تبقى البلاد "مستوطنة "
(متسلطنة بالسرطنة)
إيه اللي خدناه م الكرامة والإباء
حبة خطب وكلام...كلام
إحنا راهننا على النظام
ورضينا بخيار السلام
(بخيار)حنسد عين الشمس بيه
علشان مايطلعش النهار
ويطلع لمين؟
حبة معارضة مغرضين؟
وحسب بيان السلطة
شلة مأجورين؟
ياعم فضك سيرة
وارضى بقسمتك
دا شعب مش فاهم أكيد
يالا اطرده من رحمتك
وإن كنت غاوي الحكم
خليك مطرحك
حاغطس واقب وأعود
بشعب يريحك
راضى وعمره مايجرحك
أخرس ومايسمعش
وأعميلك عينيه
مش كل قرش يبص فيه
مايقولش لأه، وفين، وليه
يضرب ينفض في السليم
وعلى الصراط المستقيم
كل اللي يعرف ينطقه
عاش الزعيم
يحيا الزعيم
عايزين نجرب الاضطهادللشاعر : أحمد فؤاد نجم
الله عليك وعلي احمد نجم
ردحذفاسف علي تقصيري تجاهك و لكن الظروف يا عزيزي
محمد بيه مساء الجمال...شكرا للزيارة والتعليق وربنا يقدرنا على لاد الجمايل ....
ردحذفبالحق اخبار ابو الرجال ايه اقصد عبد الله ربنا يخلهولك يارب وتشوف عيال عياله ياريت تطبع على جبينه قبلة وتبلغه انها من عمو على عينه...
تصدق الراجل دة مش ممكن يتكرر
ردحذفانت بتقراله و انت مش حاسس أصلا
سهولة و سلاسة و أسلوب
حاجة توحفة
يا راجل فعلا تقراله تحس هوا دة روح مصر
على فكرة: أنا كنت جاي عشان أردلك الزيارة بس لقيت حاجة توحفة
إكتشفت إني كنت مفتقد مكان جميل زي دة
تسمحلي أتابع مدونتك و أحطها في المفضلة عندي؟