Translate

الأربعاء، مارس 26، 2008

اضراب 6 ابريل هل هو حقيقة ام خيال

انتفاضة حرامية جديدة فى طريقها الى الظهور...
التاريخ يعيد نفسه...
اتذكر انتفاضة الحرامية الاولى فى عهد الزعيم طيب الذكر محمد انور السادات عندما وصفها بانتفاضة الحرامية...
لو حدثت ايضا هذة الانتفاضة فسوف يخرج علينا الزعيم طيب الذكر محمد حسنى مبارك ليعلن لنا انهم مجموعة من الحرامية...
حرامية حرامية بس نخرج لنعبر اننا نرفض ان نُساق مثل قطيع من الغنم...حرامية حرامية ولكن يجب ان تعلم القيادة السياسية فى مصر اننا شعب مازال يعيش ولم نمت بعد ...سوف تموت القيادات السياسية ولكن شعبنا سوف يبقى الى ان تقوم الساعة...
هذا الايميل وصلنى وياريت محاولة نشره فى كل مكان من منتديات ومن بلوجات ومن ايميلات ...يجب ان تعلم السلطة فى مصر اننا جميعا مللنا من المشاكل ومن الازمات ومن الاسطوانات المشروخة من امن الدولة والمساس بامن الوطن ...كلنا نحلم بالتغيير ..كلنا نحلم بالديموقراطية ..كلنا نحلم ان يأتى علينا فجر جديد ...مللنا هذة الخلق والتى تجسم على صدورنا وكأنهم منزهون ومختارون من الله او هم سلطة الله المختار...


اضع بين ايديكم الايميل كما وصلنى

إتفقت كافه القوي الوطنية في مصر علي
أن يكون
يوم 6 إبريل
يوم إضراب عام في مصر
يوم 6 إبريل
خليك قاعد في البيت أو شاركنا فى الميادين العامة
أوعي تنـــــــــزل لكن شاركنا
ماتروحشي الشغل
ماتروحشي الجامعه
ماتروحشي المدرسة
ماتفتحشي المحل
ماتفتحشي الصيدليه
ماتروحشي القسم
ماتروحشي المعسكر
عايزين مرتبات تعيشنا
عايزين نشتغل
عايزين تعليم لأولدنا
عايزين مواصلات أدمية
عايزين مستشفيات تعالجنا
عايزين دواء لأطفالنا
عايزين قضاء منصف
عايزين أمن وأمان
عايزين حرية وكرامه
عايزين شقق للعرسان
مش عايزين رفع أسعار
مش عايزين محسوبيه
مش عايزين ظباط بلطجية
مش عايزين تعذيب في الإقسام
مش عايزين أتاوات
مش عايزين فساد
مش عايزين رشاوي
مش عايزين إعتقالات
مش عايزين تلفيق قضايا
قول لأصاحبك مايروحوش الشغل همه كمان وخليهم يدخلوا الإضراب
) حزب العمل المصري- حركة كفاية - الإخوان المسلمين - حزب الكرامه - حزب الوسط - حركة موظفي الضرائب العقاريه - عمال غزل المحلة - حركة إداريي وعمال القطاع التعليمي - نقابة المحامين - حركة أستاذه الجامعات(
6أبريــــــــــــ...
أضراب عام في مصر سلمي
أبعت رسايل لخمسة من أصحابك
ولو كل واحد بعت لخمسة
في ظرف يومين البلد كلها حتعرف
بالموبايل
بالأرضي
بالأيميلات
أو حتي رسايل عالشات في قنوات التليفزيون
أنسخوا رسالتنا وأبعتوها تعليق على كل المقالات ألي بتقروها
بيكوا وبينا البلد دي حتتغير أنشاء الله
المسيحين مع المسلمين لصالح مصر

يالا يامحمد يالا يامينا مصر مش هتتغير إلا بإيــــدينـــــــا رأيكم إيه بجد فى الموضوع ؟

هناك تعليقان (2) :



  1. أنا ليه هعمل الاضراب ؟؟


    لما الفســـاد وقــّـفوه حـارس على وطنى
    ولهيب الغلا كوانى .. وحتّ ف بدنى
    لما الحرامى سرق منى اللقمة والميه
    وسرق هدوءى وسكنى .. حتى من سكنى
    لما الحلم حتى اتسرق .. من يومى .. من زمنى
    لما النظام نسج - فى عز الشباب - كفنى
    أنا قلت هعلن العصيان
    فى يوم حزين مـَدنى

    انا قلت هعمل الإضراب
    ولم الدنيا والعالم
    فى يوم ابيض على المظلوم
    اسود كئيب على الظالم


    لما سألت عالعيش .. قالوا مفيش
    وقالو العيش على الأبونية
    وسألت عالزيت .. وعزّيت
    لما عرفت إن الزيت بتسعة جنيه
    وسألت على حديد البُــنا
    قالوا الحديد .. خلاص فى كرش البيه

    انا قلت هعمل الإضراب
    ولم الدنيا والعالم
    فى يوم ابيض على المظلوم
    اسود كئيب على الظالم


    لما البشر والحجر
    ووادى النيل ببنى أدمينــــه
    لما زمان الوطن بايامة وشهورة وسنينه
    لما الصغير والكبير
    قالوا كفاية مش عايزينــة
    كفاية علينا حكم سنين
    تخرج الواحـــــد من دينـه

    انا قلت هعمل الإضراب
    ولم الدنيا والعالم
    فى يوم ابيض على المظلوم
    اسود كئيب على الظالم


    لما المبيد صبح سرطان
    يهرى ف ارضنا .. فى الزرع .. فى مواطن
    لما بؤ الميه صبح وسخ داكن
    لما خرب الاقتصاد .. واحد على تلـّـــهَ
    قاعد وشارب وواكل وساكن
    لما الشباب بيصرخ .. فى ذل ومهانة
    ولا شغل ولا توظيف ولا شقة ومساكن

    انا قلت هعمل الإضراب
    ولم الدنيا والعالم
    فى يوم ابيض على المظلوم
    اسود كئيب على الظالم

    تحياتى
    أحمد الصباغ



    ردحذف
  2. اخى الاستاذ احمد الصباغ
    آسف للتعليق المتأخر على تعليقك وفى الحقيقة فاننى قد تشرفت بمعرفتك وسوف احاول تبادل الزيارات على بلوجك الخاص والذى من مشاهدتى له احس انه من البلوجات والتى تعشق زيارتها من آن لآخر....اشكرك مرة ثانية

    ردحذف

شكرا للزيارة والتعليق