والله صعبان على خالص هذا المجلس العسكرى (مايصعبشى عليك كافر يا أخويا ) , بين المطرقة والسندان ومش عارف يلاقيها من مين ولا مين من الثوار ولا من ماما امريكا وكل مايعمل حاجة لا يرضى عليها الثوار وربما ترضى عنها امريكا واذا رضوا عنها الثوار لا ترضى عنها ماما امريكا وكأن ماما امريكا دى مرات ابونا
تمثيلية اتهام المجتمع المدنى والتى تم الترويج لها الايام الماضية ووجد فيها شعبنا الغلبان مادة خصبة لمتابعة حلقاتها حتى ستات البيوت فى المنازل تركوا الأكل على النار واتحرق الأكل قال ايه قاعدين بيحكوا لبعض على شوية العيال الخونة اللى تم تمويلهم من الخارج اقصد من ماما امريكا وكانت صاحبة الدور الاكبر فى تفجير هذة التمثيلية الست فايزة ابو النجا والمتواجدة فى وزارات ماقبل الثورة ومابعد الثورة واكاد اشك ان ماما امريكا فرضاها علينا , فرده يعنى وارهاب بان تبقى , المهم ماما امريكا دخلت فى التمثيلية كشريك هام واستخدمت اسلوب العصا والجزرة ولوحت للمجلس العسكرى بانها ستجيش الجيوش وستجمع كل اساطيلها لضرب مصر وتحرير الاسرى الامريكان من يد العدو المصرى ولأن رئيس المجلس الأعلى العسكرى راجل صعيدى وعنده كرامة فلقد رفض اسلوب العصا قامت ماما امريكا فكرت باستخدام الجزرة وهى الدولارات وقطع الغيار العسكرية والتى يحتاج اليها الجيش المصرى لتحرير فلسطين فى المعركة القادمة , ودارات حوارات ودارت مجادلات بين مؤيد لما حدث ورافض لها والناس صدقت الحكاية والقضاة انقسموا على انفسهم والشباب يسب كل منهم الآخر وربات البيوت تركوا واجباتهم المنزلية وقاعدين ليل نهار ماورهمش غير قضية منظمات المجتمع المدنى وتمويلها الخارجى واهو بينى وبينكم الشعب ينسى موضوع الانتخابات الرئاسية وفجاة نلاقى نفسنا بنصفق لجمال مبارك او احمد شفيق رئيسا للجمهورية وبعد ٣٠ سنة ننتظر قيام ثورة اخرى سنة 2062 وعليكم بخير
ليست هناك تعليقات :
إرسال تعليق
شكرا للزيارة والتعليق