ياسلام على التعديلات الدستورية الاخيرة...كدة بصراحة دخلنا عصر الحرية من اوسع الابواب والريس بصراحة من الذين اذا وعدوا اوفوا بالعهد ...ربنا يخليك لمصر يافندم ده احنا من غيرك ولا حاجة...فعلا ياريس هم القُضاة وحدهم المنزهين فى مصر ما السلطة كلها نزيهة ولا تعرف للباطل اى طريق...عدل عدل ياريس ربنا يبارك لنا فى عمركقال قُضاة قال قُضاة آخر زمن جايين قال ايه عايزيين يشرفوا على الانتخابات...هى حصلت دى تبقى العملية لعب عيال فى لعب عيال...ياريتك ياريس تشرف بنفسك على الانتخابات دة انت حاتشوف العجب ياريسحاتشوف حجم النزاهة والشفافية اللى مصر عمرها ماشافته ولا عاصرت مثله قال ايه المادة 88...كدة ياريس يبقى انتهينا من مشكلة القُضاة واللى وجعوا دماغ سعادتك اليومين اللى فاتوا وانت بصراحة مشفاضى لوجع الدماغ عايز تدخل مصر الولة التاسعة فى مصاف الدول الكبرى (هم 8 دول حتى كتابة هذة الكلمات ياريس) واحنا باذن الله تعالى سوف نصبح الدولة التاسعة وسيبك من شوية القُضاة دول....
نرجع للمادة 179 رغم انك ياريس بحجة الارهاب حاتلغى وحتتعارض مع المادة 41 و44 45 الا اننا معاك ياريس واحنا تحت امرك وامر عساكرك فى اى وقت من ساعات الليل المتأخرة تقدروا تييجوا داخل بيوتنا وتفتشوا وتضربوا نسائنا طالما اننا حاندخل فى مصاف الدول الكبرى..ولا اقولك حاجة ياريس ماتلغى البتاع ده واللى اسمه الدستور وريح دماغك من وجع الدماغ واحكمنا بالطريقة اللى تعجب حضرتك وخليك ياريس على الخط اللى سعادتك ماشى فيه وربنا يخليك لمصر ولشعبها ...
ليست هناك تعليقات :
إرسال تعليق
شكرا للزيارة والتعليق